متن کامل نوحه ای باد صبا کرب و بلایه گذر ایله
متن نوحه ای باد صبا کرب و بلایه گذر ایله
ای باد صبا کرب و بلایه گذر ایله
اوردا یارالی تشنه حسینه خبر ایله
.
عرض ایله اولوب زینبوون حالی پریشان
دور قبرده یاتما ، یارالی جانوه قربان
افسرده رقیه قوری یرلرده وئرور جان
گل شامده ویرانیه بیرایله نظاره
بیچاره قالوبدور باجون ایله اوناچاره
.
سینونده یاتاردی قیزون ای سینه شکسته
ایمدی قوری یرده غم ائدوب جانینی خسته
توپراقلارا زلفی توکولوب دسته به دسته
مشگلدی منه زلفینی توپراقه سالوبدی
گل صورتی غمدن ساری گل تک سارالوبدی
.
رنگی سارالوب گل کیمی سولموش گه بنزر
زلفی توکولوب صورتینه سنبله بنزر
روحی قفسیندن بیراوچان بلبله بنزر
نه چاره قیلوم گوشۀ ویراده سنسیز
سن تک قوری یرده ئولوری غسل وکفن سیز
.
قویما قیزوی خوار اولار رفع محن ایله
شهزاده بالان جان وئروری گل کفن ایله
قازقبرینی ویرانه نی بیت الحزن ایله
وئرغسلینی قوی قبره گوزوم اشگیله دولسون
قوی شام گل شاه حجازه وطن اولسون
.
فاش ایلدی درددلینی گوزیاشی آخدی
یاندوردی حرم اهلینی نارغمه یاخدی
آغلارگوزیله بیر او یتیمه قیزا باخدی
گوردی بالانون روحی کنار اولدی بدندن
آزقالدی ئوزی رخت علایق سویا تندن
.
.
القصه وئروب جان بالا مقصودینه چاتدی
صبح اولدوزی تک برج حیا اولدوزی باتدی
اولاد علی ناله سسین عرشه اوجاتدی
شهزادیه گوربیر نجه غسل وکفن اولدی
گویا کفن اگنینده اولان پیرهن اولدی
.
.
دفن اولدی بالا زینبین احوالی پوزولدی
قان یاشیله اهل حرمین گوزلری دولدی
زهرا قیزی بومجلسه راثی ئوزی اولدی
قارداش بالاسیندان او زمان عمه ال اوزدی
اهل حرمی قبرینون اطرافنه دوزدی
.
.
هرکیم ئوله اوندان قالار عالمده نشانه
ایلرله لباسین ئوز عزاسینده بهانه
دوندردی بونیسگیل اویانان دیللری قانه
بیر کوینگیدی بیراثر اوندان بدنینده
دفنینده کفن ایلدیلر پیرهنینده
.
.
بوغم گتوروب آل علی قلبینی درده
ماتمزده لر قوردولار بیرماتم او یرده
اول خوردا مزار اوسته چکوبلرنچه پرده
گوزیاشلی لارین قلبینین آرامی آلیندی
قبراوستونه پرده عوضی زلفی سالیندی
.
.
اولدی هره سی بیر دلیله کاشف مطلب
ماتم زده لر گوزیاشینی توکدی مرتب
نسگللرین اوخشاردی خانیم عمه سی زینب
سویلردی رقیه نیه گوزدن منی آتدون
هجرونده بوگوزیاشیمی خون دله قاتدون
.
.
عمرون گلی بوگوشه ویرانه ده سولدی
کیم گییدوقی پیراهنیله قبره قویولدی
هانسی قیزا غساله اونون عمه سی اولدی
شرح غمیوی اشگیمیله توپراقا یازدیم
دلده آدون آغلار گوزیله قبروی قازدیم
.
.
دنیاده ادب گلشنینه بیرگلدون سن
اصغرکیمی بیرغنچه گله بلبلدون سن
عمّه ن سنه قربان نجه شیرین دلیدون سن
سن نازیله شه سینه سی اوستونده یاتاردون
چوخ غم گوروب اوج سینیله دنیانی قوتاردون
.
.
سن بیرگلیدون بادجفائیله سارالدون
ایوای باباوای سسلدون آرامیمی آلدون
سن چوخ گئجه لر گوشه ویرانه ده قالدون
قلبیمده کی نسگللرون آرامیمی آلدی
ئوز دردیوی فاش ایلمدون سینه قالدی
.
.
بیرنسگلیوه یانّام ئولونجه من مضطر
لای لای دئدون آغلار گوزیله سسلدون اصغر
گه سویلدون ای عمه هانی قارداشیم اکبر
اکبر چاغوروب عمه دین دیللره قربان
بوتوزلی مزاره باخورام قلبیم اولور قان
.
.
اوخشاردی حزین بیر سسیله زینب نالان
گوردی اوجادان باجیسی کلثوم ائدور افغان
گوزیاشینی رخساره دوزور چون در مرجان
سسلندی باجی سن که ائدورسن بئله شیون
بوخورداجا اطفالی نجه ساکت ائدوم من
.
.
عرض ایلدی بیر نسگله یانام بودی مطلب
بوشیونه باعثدی رقیه م باجی زینب
گوردوم دولانور منزل ویرانی گئچن شب
سسلوردی بابا سوزلرینه من قولاق آسدیم
دوردوم یوزین اوپدیم گتوروب باغریما باسدیم
.
.
آلدیم یانیما گوزیاشینی سیلدیم یوزیندن
آندورمادی دردین منه بیرکلمه سوزیندن
اشگین گینه گوردوم توکوری لیک گوزوندن
آزآغلا دئدیم بس نیه بوحاله قالوبسان
یات راحت اول علن ندی گل تک سارالوبسان
.
.
وار سرّی دئدی اشکیله دولموش گوزوم عمه
بنزرسارالان بیرگله سولموش یوزوم عمه
وئر گوش منه واردی اورکده سوزوم عمه
آهسته دیوم بیلمیه بیرکس ئوزون سن
گلمور یوخی آخر گوزیمه عمه آجام من
.
.
بونسگللی دوشدی یادیماناله م اوجالدی
گئتدی ئوزی دللرده غم افزا آدی قالدی
گلسون بوجهانه ائله قیز امر محالدی
دردین دئمسین محنت وغم یولداشی اولسون
شیرین دل،ادبلی،ئوزینون اوچ یاشی اولسون
.
.
ای مخزن عصمتده ایشیقلی در وگوهر
وی کرب وبلاشاهینه بیر سویگولی دختر
ای باب الحوائج آدی ای خواهر اکبر
بو(احمدیان)سائلی سالمانظروندن
ایستور صله گوزیاشلی خانیم عمه لروندن
شاعر: حاج اصغر احمدیان خسروشاهی
نظرات (۰)